အယွေချေရို့ အိမ်

 ပင်ကြီးပင်ရိပ်တိနန့် အရိပ်ဆဆိုင်းနီပြောက်မထိုးအောင်အုပ်ဆိုင်းနီရေအတွက်နန့်ဒေပိုင်ပြင်လယ်ဂေါင်
ဖက်ကိုထွက်လားဖို့မပြောကေ့သန်းလို့တောင်မကြည့်နိုင်တောကနီအောင်နီပူနိန်ကေလေ့အကျွန်ရို့
ရွာထဲမာကမက္ကလာချေတောင် ဂေါင်းထက်တင်ဖို့မလိုဘဲ ထွက်လားလို့ရရေ ။ သရက်ပင်၊ပနဲပင် ၊
အုန်းပင်ကွမ်းသီးပင်တိကအိမ်တိုင်းမာပိုင်စိုက်ထားကတ်တေ၊ဘုန်းကြီးကျောင်းမာဆိုကေလေ့
အပင်တိက ကျားတောင်ခိုဖို့ဆိုချင်ယင့်၊ချောင်းနားဖက်မာဆိုကေလေ့ကုက္ကပင်ကြီးတိ မကန်နန့်
ယင်းအပင်တိကလေ အသက်ဇာလောက်ဟိယာလေတော့မပြောတတ်ဧရမအကြီးသန်တိ အမိရို့မှတ်
တတ်ချေကပင်အကြီးသန်ဟိရေဆိုယင့် ။

ယင်းလောက် အရိပ်ကောင်းကေလေ့သွင့် ဒေနှစ် နီခါဖက်က ကကောင်းပင်ပူရေကာ ။ ရာသီဥတုတိလေ့
ဖေါက်ပြန်လခဗျာယ်ထင်ယင့် ။ အေတွက်နန့် လူတိစွာ ပြင်စဖက်ကျရေအိမ်တိမာ လာစုမိနီိကတ်တေ။
ပြင်စဖက်အိမ်တိကလေ့ လီရရေလို့ဆိုစွာရာ ။တိုက်လာရေလီကလေ လီပူတိ ။ နီလို့မရထိုင်လို့မရ
အောင်တခုမလားဂု ။ အကျွန်ရို့တိကဒယောတပိုင်းနန့် နီလို့ရရေဆိုပါဖိ ။ မမတိ မလားဂုဒုက္ခ ၊
အပျိုမချေတိဆိုပိုဆိုး ၊ မင်းကျွန်မတိက တချို့ ရင်ကန့် ပဏာ ရာသီဥတုဒဏ်ကို ဖြေရှင်းလို့ရသိရေ ။
တချို့က ချောင်းနားဆိပ် က ဇရပ်ထက်မာ ထလန်းကားလန်လို့ ၊ တချို့က ဘုန်းကြီးကျောင်းထဲက
ကန်ဘောင်နားက ဇရပ်ထက်မာ ဖဇင်းမှောက်လို့ ။ ယပိုင်ယပိုင်အပူဒဏ်ကိုဖြေရှင်းနီကတ်တေ ။
အချေခါပိုင်ဆိုကေ ချောင်းထဲမာရာကျုတ်ပစ်တမ်းကဇတ်လို့လားစိမ်နခီချင်ရေ ။အမှန်ပြောရကေ မိုး
အယင်ကျပါစီလို့လေ့ ဆုမတောင်းချင်သိ ။ တနှစ်ပတ်လုံးသီမကန်အောင် လုပ်ထားစွာတနားတပွေ
ချေလေ့အညောင်းအညာဖြေချင်သိရေနှင်းရာ ။ အကျွန်ရို့အုပ်စုကတော့ ခါ အကျွန်ရို့ လူပျိုအိမ်လို့ ဆိုကေလေ့ရရေအယွေချေယိုင်နုစိန်ရို့အိမ်က ဒန်ခံချေမာ လှိမ့်နီကတ်တေ ။

အယွေချေအိမ်က အကျွန်အချေခါကပင်စားအိမ်သောက်အိမ် ။ အဘာသတ်ဖို့လိုက်ကေလေ့ ဒေအိမ်မာ ၊ထိတ်ခနဲ ဆိုကေ ဒေအိမ်ကိုစီပြီးလာယာ ၊ အယွေချေက အလိုလိုက်တေ။ယင်းခါက သူရို့ အိမ်မာက ယောက်ျားမြင်ဖူးစွာကမဟုတ်စွာကို ၊ အမှန်ဆိုကေ အကျွန်ရို့နန့်အယွေချေရို့က အရင်းအချာတိမဟုတ် ၊ စစ်ကတ်လို့ တော်နီကတ်စွာရာတခု အစိုင်တော်စွာတိရာ ယကလေ့အယွေချေမာကကောင်းချစ်တေ။ ဒေအိမ်ဒန်ခံချေကနှစ်ချောင်ချီကြမ်းပြင်နန့်ကသောင်းဝါးကိုနှစ်စိတ်စိတ်ထားရေဂေါင်းအုန်းတိစွာ တိုက်ထားပိုင်ပြောင်လို့လဲ့နီရေ ၊အကျွန်ရို့တိဇါ့လောက်လှိမ့်ထားကတ်လေဆိုစွာကြည့်ဖိချက်။ ဒေအိမ်မာကကလေချေတိလေ့ပျော်ကတ်ဖို့နှင်ရာ မောင်းဆုံတလုံးလေ့ ဟိရေခါဒေအစုက ကလိန်မေချေတိလေ့ ဒေအိမ်မာ ဆန်လာဖွတ်ယင်းလာစုမိကတ်တေ ။ ကလေချေတိ ပဒါကာသီး ခိုးလာ
ကေ သုတ်စားကတ် ။ သရက်သီးခိုးလာကေ ငပိဆရေ စားကတ်နန့် ရရောင်းသတ်ပနာပျော်ဖို့လေ့
ကောင်းရေ ။ အယွေချေမာ ယချင့်တိနန့်ခြီနီစွာဗျာယ် ။ ဒေ ဂူရာဂျိုင်နန့် ဇာတခုလေ့အကျိုးဟိစွာမဟုတ် ငပိရာကုန် ဆားရာကုန်ယကေလေ့ခြီရေ ။ လူတိမရောက်ကေမနီတတ်ဖြစ်နီဗျယ်။

မမှတ်ရရတခါက အကျွန်ရို့ကျေးဇုနန့် အယွေချေ အဘေချေဘားမာ နရင်းကို အအုတ်ခံဖူးရေ ။
ဖြစ်ရပုံကဒေပိုင် အကျွန်ရို့အုပ်စုစွာ ကြက်ခိုးစားကတ်တေ ၊ဖြစ်ချင်စွာမာ ယင်းကြက်ကအချေမိ ဖြစ်နီရေ
ကြက်ချေတရွီကျန်ခခါကြက်ရှင်မလေ့ သည်းမခံနိုင်ဟိဖို့ အယွေချေရို့အိမ်ရှိမာလာပနာ တဝကျိန်ရေလတ်
အယွေချေလေ့မခံနိုင်ဗျာယ်ဟိဖို့ယေနန့်ခွန်းကြီးခွန်းချေ ဆဲနီကတ်စွာ အဘေချေ ဟန့်ကေလေ့ မရဖြစ်လ
ခရေလတ်နရင်းအအုတ်ခံလိုက်ရမပွဲပြီးလခရေလတ် ။ယင်းတလေ အကျွန်ရို့အုပ်စုလေ့ရွာနားမကတ်ဝံ့ဘဲ
ဘုန်းကြီးကျောင်းမာ တလလောက် အိပ် ဖြစ်လိုက်ကတ်တေ။အယွေချေကိုလေ့သနားလို့မကျီ ။
အယွေချေခမျှာ မာ ရန်ဖြစ်ဖို့လေ့ တတ်လီဖို့စွာမဟုတ်ချင့် ၊ ဂျီဝိဂျီဝါနန့်အေပိုင် အကောင်းပြောနီကေတောင် စကားတခွန်းစွာဖင်တခြားဂေါင်းတခြားဖြစ်နီစွာမာလေ။ဇာလောက်မကြာအကျွန်ရို့လေဂဇိုင်ဂဇိုင်မဟုတ်တကွန်ချေနန့်ပြန်ရောက်
လခကတ်တေယင်းအိမ်ကို၊အဘေချေလေ့တခုလေ့မပြောခါမအကျွန်ရို့တိလေ့ကိုယ်ရို့မဟုတ်တေပိုင်နီသားကျလ
ခကတ်တေ။အဘေချေလေ့စိတ်ကောင်းရေလူပါရာ သူ့မာ ရက်ဆုံးနီဝင် မြီရခွက်ကာနာချေတလုံးနန့် အဖန်ရည်တည်သောက်နီစွာကလွဲလို့ဗဇိဗဇတ်များရေလူမဟုတ်။ယင်းရခွက်ကာနာချေလေ့တရက်တရက်လာကေဖင်အီးရရေ
အချိန်လို့ဆိုစွာမဟိ၊အညာရီထင်းတောင်ပိုင်တပုံစွာလေ့အဖန်ရေဆောက်တွင်းကုန်ရေ၊လာမျှလူကိုလေ့အဖန်ရည်
တည်နီစွာဗျာယ်ယေသူမာ။ လာသမျှလူအတွက်လေ့ခွက်မလောက်ဆိုစွာမဟိစီရ ၊မာလခွံတိကိုအမွီး
အမျှင်တိဓါးနန့်ခြစ်ပနာဆီချေပွတ်ပီးကေကြတ်စင်ထက်မာ လိုဒေါင့်မင့်ဒါ မကန်တင်လို့ဟိယင့်၊
အဘေချေ အကြောင်းပြောကေ အဘေချေ နှာမေ အကြောင်းလေ့မပြောလို့မဖြစ်ချင့် ရာဇဝင်နန့်ဂို၊
အဘေချေနှာမေက မောင်ထွီး ။ အဘေချေ မိဖတိမာ ဘေချေကိုရခါ နောက်ဆုံးဘိတ် ထင်ပီးကေမောင်
ထွီးလို့ပီးထားပြီးခါမနောက်တယောက်ရလာလို့မောင်နှောင်းချေ လို့ပျင်ပလိုက်ရရေလတ်။

မင်းလမ်းမထက်နပူဂျဂျာမာ ကားတစီးဂေါင်းကဖင်က ခေါင်မိုးကလူပဒေသာပင်ပိုင်အပြည့်တင်ပနာ
တရွီရွီနန့်ကြိုင်းပါချိအောင်လိပ်တွားတွားလို့လားနီစွာဒန်ခံချေကလှမ်းမြင်နီရရေ၊ ကားခမျာ
နူးရာဖင်ထိုင်ပါရေထော၊ကားနောက်ဖက်မာလေ့ဖုန်တထောင်းထောင်းထလို့လားကြည့်စရာမလို
ယင်းလူတိအားလုံးစွာ မျောက်ဖြူတိဖြစ်နီကတ်ဖို့စွာကိုအတွိအကြုံအရသိရေ။အေလောက်အပြင်
ကိုမထွက်ချင်လောက်အောင်ပူနီစွာမာ ဇာဝဋ်လိုက်ဇာဖီးသင့်လို့အေလူတိ ကဇါတွက်လားနီကတ်ရလေ
နန်းလို့စိတ်ထဲကမိန်းခွန်းကို နားထဲ တို့ဝင်လာရေအသိချေက ချက်ချင်းသဘောပေါက်လားစီရေ။
အော် ထိုဖက်ရွာ ဒုံးပွဲက တရက်နှစ်ရက်ရာလိုသိမ့်ယာကို။စံကျောင်းစံချိန်တိတောင်အညွှန့်တိမြင်နီရဗျာယ်။ လူတိမြို့ကိုတက်လို့ဈီးပြုကတ်ဖို့နှင်ရာ ။ ဘုန်းကြီးကျောင်းမာ မမချေတိ “ဟန်”တိုက် နီကတ်စွာက
ဆိုင်းသံဗုံသံတိနားထဲရောက်လာလို့သတိရလားရေ ။နီစောင်းကေ အကျွန်ရို့တိလေ့တလား
ကလေ့ကျင့်ဖို့ထွက်ကတ်ရဖို့သိမ့်။

“ဟန်”ဆိုလို့“ဟန်” ဆရာငှါးရစွာလေ့ ဝထုတပုဒ် ၊ပြောပြရခန့်သိမ့်၊ဟန်ဆရာငှားဖို့ခါ ကလေချေတိက
ရခိုင်တေးခင်းနန့်သင်ရေဆရာကိုမှငှါးဖို့ ဆိုခါ ယင်းဟန်ဆရာ ရာဇဝင်က မကောင်း ၊ဒုံးပွဲဟိလို့ ငှါးရေရွာ
တိုင်းမာမယားတယောက်စီ ရရေ ။ယင်းအတွက်နန့် မ မရှင်ဟိရေတိုင်သားတိကမျက်ချိတ်တတ်
တေဆိုပီးကေ မငှါးဖို့ကန့်ကွက်ရေ၊တဖက်က လေ့ယင်းလူရစွာမမ တိကိုကြည့် မဆမတိ မင်းကျွန်မတိ နာမေပျက်ရေမမတိရာမျက်ချိတ် တတ်ကေအပျိုတိကို ယူဖို့နှင်းရာလို့ ဇောဒကတက်တေ၊
ယပိုင်နန့်လို့ဟန်ဆရာကိုလေ့မယားမယူရ ရွာကရရေမမလေ့ရွာကနှင်ထုတ်ခံရ
ဖို့ဆိုရေ ကတိစာချုပ်နန့်ယင်း“ဟန်”ဆရာကိုငှါးဖြစ်လခရေ၊ အဂုဆိုကေ အကျွန်ရို့လေ့ “မင်းလေ့ရခိုင်နန့် ” ဝင့်နီအောင်ကဖို့တတ်နီကတ်ဗျာယ်။ အကျွန်ရို့“ဟန်”ဆရာကတော့ခါ မင်းရို့အဖွဲ့ ပထမ ရစီရဖို့ဆိုယင့်။

နီမစောင်းခင်တနားပွေချေ ထမဆီငင်ပလိုက်မေလို့မှတ်တေ။အိမ်မာရောက်နီကတ်တေဟိသမျှလူရောင်းခနဲ
ရယ်သံကြောင့် အိပ်ခါနီးချေလန့်ကျလခရရေ၊ဖြစ်ပုံကအယွေချေရို့၏အသက်ကြီးပြီးမကံစမ်းမဲပေါက်ထားရေ
ချထားစရာနီရာမဟိလောက်အောင်ချစ်လှစွာသောမျောက်လက္ခဏာမာတင်မွီးထားရေ တဦးတည်းသော
မျောက်ရငံချေကို အမိသယ်မကပြောရေ စကားကြောင့်ပွဲကျလခစွာဖြစ်ပါရေ။အယွေချေကသားတော်မောင်
ကို ပြောလိုက်တေစကားမာထုံးစိုင်အတိုင်း ဖင်တခြားဂေါင်းတခြား ၊“ ဟေးးး ရွင့်ဇာချေ ဒုံးပွဲမမှီချင်ဗျာယ်လာ နပူစားရေချိုင်(ချဉ်)ခံရေ နင်ခေါ်စွာငါမကြားလား လာဖို့လားမလာလာနင် ” လတ်။။ ။။

သားတော်မောင်မာကအမိသယ်မအော်စွာကြားလီဖို့မပြောကေ့ ပုပါချိအောင်ဗြီးလခစွာအမိသယ်မမာအရိပ်
တောင်မကျလိုက်။


ကိုမင်း(24.7.2010)